因為Sony而睇呢個劇，初時有啲R頭，而家睇完沉澱左幾日就開始掌握到個思路。
細個睇卡通有類題材總係有關機械人/ 精靈/ 神仙/ 外星人/ 未來人突然黎左要寄居喺主角嘅家庭，其間發生左唔少事，亦幫助主角一家解決問題或者令佢地關係更融洽咁樣。其中最耳熟能詳嘅就係叮噹。
而香港唔少家庭都有個人擔當左呢個角色，就係外籍家庭傭工。輕則打理家頭細務，重則成為家人感情要好嘅知己。
我諗《萬輻》入面嘅瑪利亞就係建基於咁嘅雛型，再揀左由Sony去演繹呢個一三五係阿Sir，二四六係Miss嘅身份，令到成件事更加豐富左。亦都因為呢個特別嘅身份，Sony比一般人睇野更能理解箇中嘅複雜性，同埋更豁達透徹。
Maria係自《歡樂今宵》年代港人廣為認知嘅典型菲傭名字，亦係聖母嘅名稱，所以劇中嘅瑪利亞除左係一個融入家中嘅家務助理，亦都有救世者嘅意味，直接或間接令家中各人得到啟發同埋救贖，之後就功成身退。
