Jean Paul Gaultier Diet Coke

呢系列嘅廣告好似好得意咁，睇深一層係彰顯男性支配主宰，女性物化為扯線公仔任人擺佈。

整輯廣告女性都是被動的，包括第一集被相機圍影，第二集被心理治療，第三集被偵探盤問。佢地被鏡頭以外嘅無形之手控制之餘，亦被「巨人」喪波形象大改造。

喪波擁有多重身份，記者又係佢，心理治療師又係佢，偵探又係佢，設計師又係佢，仿佛係無處不在支配一切。身形差距更凸顯出喪波就好似三個女仔嘅救世者咁，（第二集同第三集更為甚），喺佢地最徬徨無助嘅時候伸出援手。當中喪波為佢地寬衣解帶嘅情節，加上公仔欲拒還迎嘅掙扎、發出呻吟聲以及不時有躺卧戙高腳嘅姿勢，將女性塑造成sex object。第三集雷電交加，喪波手持利剪，剪斷外間聯絡，公仔被拖行，更令人有「出事」嘅聯想。

但事後各女事主都感激施暴者。

《春嬌與志明》香港文化悍衛戰

《志明與春嬌》純粹係本土文化嘅展現，身處其中會覺得taken for granted，而《春嬌與志明》面對住神州大地嘅衝擊，有差異更突顯本土文化。

今次《春嬌與志明》玩更多港式俚語，而最明顯嘅對比就係春嬌與尚優優，可以話係陀地VS北姑。

春嬌無標緻嘅面孔，無出眾嘅身材，講野掘雷鎚硬繃繃。相反做空姐嘅尚優優有樣有身材又溫柔嬌嗲，直情係男人夢寐以求嘅完美女神。但志明最後都係揀番春嬌，就好似佢鍾意食7-11意粉咁，唔算係好好食，但鍾意就係鍾意。好似比喻緊香港人對香港嘅感覺咁，成日覺得香港呢樣唔好果樣唔好，一齊相處有磨擦有不滿，但有感情有經歷。雖然問題仍未解決，但咪又繼續喺埋一齊law~

同樣，春嬌遇上阿Sam，張志明做唔到嘅佢通通做到，但最後春嬌都無投向佢懷抱。

春嬌：「我好努力去擺脫張志明，最後我發覺，我變左另外一個張志明。」

Let 張志明 be 香港。

有時我地想擺脫香港人嘅身份，但跟本擺脫唔到，已經internalize左。

當然，仲有另一個勝出嘅香港代表Brenda啦。