歐鎧淳

琴日 facebook 洗版嘅除左「3C」，就係香港游泳代表隊為「新世界維港泳」拍攝嘅宣傳照。反應係大致讚好嘅，但我對此有啲保留。其中最出事係歐鎧淳（唔洗驚，我唔係話佢走光），不過佢套白色泳衣最似底衫褲，加上頭髮濕濕，朱唇半張，目光呆滯......似乎帶有 provocative 嘅成份喎。

如果係model 或者藝人咁影我覺得ok，但係以港隊運動員身份我覺得個尺度要高啲。或者佢本人都唔覺有問題，我都只不過係讀過下 gender 先至略為指出到問題所在。咁呢個課題無絕對界線同準則嘅，但作為女仔要有呢種意識同警覺性，再自主選擇點樣將自己呈現於人前，咁先至可以保護到自己，唔係俾製作人搵左笨同埋俾人J左都唔知咩事。

#我係咪好似企喺學校門口捉人校裙嘅麻煩訓導
#又或者我係訓練囡囡嘅媽媽生呢

盂蘭節，我想推介一部港產片﹣《魂魄唔齊》

盂蘭節氣魄更壯  盂蘭勝會心中不必驚慌...

適逄盂蘭節，我想推介一部港產片《魂魄唔齊》。（2002年上映，當年我仲讀緊中學。）

話說，容祖兒飾演嘅紫雲飛係三十年代當紅嘅反串文武生，為左心儀嘅蔣二少(謝霆鋒飾)，破例一次演花旦，唱《樓台會》以表明心跡。可惜唱到一半，戲棚上其中一塊花牌鬆脫，紫雲飛被擊中頭部削去半邊面而死。其魂魄因而劈成兩半，其中半個魂魄投胎成為陳奕迅飾演嘅路初八，所以紫雲飛想初八為佢完成心願，唱埋未完嘅《樓台會》，以及尋找蔣二少嘅下落。

陳奕迅，容祖兒，謝霆鋒，鄭希兒，齋睇cast似係英皇群星偶像劇。不過令我最印象深刻嘅就係楊淇，佢飾演一個對靈界好奇一直好恨見鬼嘅女仔，到後來終於俾佢見到，就係佢父親吉叔(文千歲飾)，原來失踪多時嘅吉叔喺內地遇上交通意外身亡。「傻女，唔好喊啦，你咪一直都想見到鬼架咩？」楊淇淚流滿面呢一幕令我至今仍然歷歷在目，就係果時開始鍾意左楊淇。佢就係憑呢套戲獲得22屆香港電影金像獎最佳新演員提名。佢演戲真摯自然，笑容又好燦爛，靚得黎好舒服(除左真人靚，喺麥曦茵鏡頭下尤其靚)。近年見佢越黎越多演出機會都替佢高興。

除此之外，當年容祖兒為左演呢個角色，特登跟紅線女學過唱腔造手，後來二人出席一個公開場合，女姐叫祖兒即席唱兩句粵曲，但祖兒扭扭擰擰，搞到女姐有啲掃興，場面尷尷尬尬。不過最近小鳳姐喺演唱會即興叫坐喺觀眾席陪母親睇騷嘅容祖兒上台，佢手到拿來咁就可以同小鳳姐合唱一曲《順流逆流》，講野得體又唔失禮，可見佢不經意在這圈中轉到這年頭已經歷練得越黎越有大將之風。

雖然當年部戲成績唔算好理想，但衍生出嘅兩首主題曲《1874》同《特別嘉賓》喺卡拉OK熱唱。

P.S. 戲中將《鳳閣恩仇未了情》改成hip hop版嘅係紅極一時嘅地下組合「MP4」，代表作有《老豆咪索茄》。


Reference：
CIA坐談會﹣《魂魄唔齊》
http://www.filmcritics.org.hk/node/1285

《如果我在東京不快樂》

隨著盤菜瑩子的知名度越來越高，越來越多人將新界圍村傳統食物﹣盆菜，寫成「盤」菜。

簡單來說，盤與盆皆是器皿，盤比較淺，盆比較深。用來端著一碟碟餸的是托盤，傳統盆菜的盆原是村民日常起居所用的洗面盆或盛水的盆。由於多數用作盛水，所以形狀都比較深。

若果以為盤菜瑩子只是一個戲仿某大台新聞報導員名字的二次創作，未免太膚淺了。

正如腦細林日曦形容：「盤菜瑩子，就像盆菜一樣複雜。」

我地呢一輩嘅人，成長於首爾仍叫漢城的那個年代，韓流還未成氣候，在文化／潮流／飲食／電玩／動漫／明星／音樂......等等，在某方面某程度上唔多唔少總會對日本有啲嚮往。而盤菜瑩子正正做左我地好多隨意門即使淮我打開兩秒後我就回來嘅人唔會咁做﹠唔會敢做嘅事。（咁講係咪有啲似尋找他鄉的故事嘅開場白？）

偶然的 tourist gaze 是浪漫的，長時間朝夕相對或會因加深了解而發現與最初的印象有所不同。無論快樂不快樂，都是經歷，正如盆菜匯聚了多種材料的精華才變得豐盛美味。如果將這本書歸類與同期推出的寫真比較，似乎忽視了其內涵吧！

當日簽名會原定時間為12﹣1pm，直至1pm 輪候簽名的人龍還捲了三個髮夾灣，但盤菜瑩子仍然堅持為每本書畫畫蓋印簽名拍照，並沒有因時間關係省略任何一個步驟，而且更向每一位讀者親手遞上她代言的奧樂蜜C作贈品，這份誠意是可貴的。

《綠豆中的瑪嘉烈‬》：Who's bad?

悶左成晚，就係鋪呢一幕。（一路只係片段重播真係差點要𠝹櫈）

趙子龍成個救世者判官咁，企喺道德高地狠狠給瑪嘉烈一個教訓。
其身不正又有咩資格教訓人？
五十步笑百步嘅係瑪嘉烈定係趙子龍？
抑或正正因為趙子龍唔係善男信女，所以佢最懂得用咩方法對付瑪嘉烈呢種朝秦暮楚嘅人？

《瑪嘉烈與大衛系列﹣綠豆》‬：離開大衛之後，瑪嘉烈艷麗也黯啞

瑪嘉烈與大衛雖然唔夾，仲成日為芝麻綠豆嘅小事嘈交，但好多時大衛都係妥協嘅一方。瑪嘉烈長期喺大衛嘅遷就縱寵下，漸漸覺得一切理所當然，變得恃寵生嬌，就算有野要隱瞞大衛，佢都唔會刻意組織一啲言之成理嘅大話，往往只係隨口噏。一旦前言不對後語鬼拍後尾枕露出馬腳，抱住你信就信唔信就算嘅心態，好似搽左面懵膏咁厚顏無恥。

不過一物治一物，無論瑪嘉烈喺大衛面前乜都死唔認錯仲惡人先告狀，但喺趙子龍面前就無所遁形，再濃嘅妝都掩飾唔到佢嘅真面目，迅即崩潰，變得無地自容。

無法面對大衛，無法面對自己，加上失去Candy呢個好友(因為對方戀愛大過天)，令素來外向嘅瑪嘉烈變得頹喪，自我封閉。

女為悅己者容，沒有大衛的瑪嘉烈，艷麗也黯啞。

《瑪嘉烈與大衛系列﹣綠豆》‬：柯榮廚與大衛

第1集

第26集 

橙喺劇中出現過兩次，分別係第一集大衛與瑪嘉烈同居之前，同埋最後一集瑪嘉烈搬走之後。（同居嘅時候除左聽過瑪嘉烈榨橙汁之外就無出現過橙。）

獨居嘅大衛總係好鍾意擺一個橙喺廳，我覺得個橙好似喺度陪佢等瑪嘉烈咁。

同 Diamond 燒烤一幕，大衛提過想瑪嘉烈搵佢多過佢去搵瑪嘉烈。因為瑪嘉烈搵佢代表瑪嘉烈個心都有佢，而唔係得佢單方面思念。

第一集拍拖初期佢掛住瑪嘉烈，不過只係望住個窗等佢出現，而唔係主動搵佢。果時係等到嘅。

至於最尾果集，（導演喺事後fb live話綁喺橙上面嘅紙係寫住大衛想同瑪嘉烈講嘅說話。）我覺得就好似掟許願樹嘅橙，大衛將願望期盼綁喺橙上面。可惜而家係無了期等待，等到發霉都等唔到。

其實仍然知道瑪嘉烈喺邊度住，喺邊度返工，但大衛頂多只係用電話亭嘅電話打俾佢，㩒一下門鐘藉以抒發思念，而沒有進一步嘅行動。因為佢知道就算俾佢搵到瑪嘉烈，但瑪嘉烈唔想見佢，都係無意思。

《瑪嘉烈與大衛系列﹣綠豆》：其實怕選擇

Jackson 心情沉重，因為經歷完與Diamond嘅生離，就經歷與Jenny嘅死別。

Diamond ：「有無野我可以幫手呀？」

Diamond 可以幫到佢嘅，唔係處理Jenny嘅身後事，而係幫佢處理隻戒指。

Jackson 唔想留住隻戒指，但係棄之又可惜，於是交俾 Diamond 保管。己所不欲，勿施於人。自己唔想要就俾人，你估 Diamond 又想要咩？但即管喺佢面前收左佢，話之理轉頭掉左佢吖，起碼幫佢解決左一件事，Jackson 個心會好過啲。

作為觀眾，果一刻都有擔心隻戒指會唔會刺激到 Diamond，但又諗真啲，Jackson 執拾物品嘅一幕似曾相識，Diamond 自從歸還 Jackson 俾嘅戒指以及 Jenny 俾嘅門匙之後已經喺度執野，包括收拾心情。既然 Jackson 未能果斷捨離，就幫佢一把啦。

其實怕選擇果個係 Jackson，慶幸佢身邊有兩個好好嘅女人，一直替佢選擇，一直容忍佢唔選擇。

《瑪嘉烈與大衛系列﹣綠豆》：倒敍

回帶去番第一集，一開頭瑪嘉烈喺堆紙皮箱面前喊住咁執野，會唔會就係倒敍法，承接啱啱最新果集大衛發現人去樓空之後，瑪嘉烈搬返自已屋企呢？


（當時背景音樂係Sinead O'Connor 唱嘅《Nothing Compares To You》）

《瑪嘉烈與大衛系列﹣綠豆》：Sum Up

結婚戒指仍然耀眼...

寂寞在流動　某些真的假的夢
滲在午夜裡隱隱的痛
各有各苦衷　無論猜中與未中
各有各用意　各有各不同

但願是場夢　對你當初的心動
我自有辦法抗拒認同
然而全無用　投入所有已斷送
我再笑著痛　你也不懂

好比火星跟水星相戀　有過燦爛影蹤
但你轉到某一個時空　失去了互通
今天儘管可始終相擁　眼裡卻沒溝通
沒法對抗倒數這時鐘　一種愛千種刺痛

夜幕是無盡　暗中多少個黑洞
看著似是愛星空飄送
曾如何情重　曾是真摰與自信
卻叫我掉進　這半空中

好比火星跟水星相戀　有過燦爛影蹤
但你轉到某一個時空　失去了互通
今天儘管可始終相擁　眼裡卻沒溝通
沒法對抗倒數這時鐘　一種愛千種刺痛

好比火星跟水星相戀　有過燦爛影蹤
但你轉到某一個時空　失去了互通
今天儘管可始終相擁　眼裡卻沒溝通
沒法對抗倒數這時鐘　一種愛千種刺痛
在這世界那一個時空　可跟你往日重逢

（陳奕迅《黑洞》）

《黑洞》呢首歌再一次喺劇入面響起，真係越聽越心噏。

而 Diamond 同 Jackson 亦都 sum up 左。

由近況講到往事，經歷越開心，回憶就越痛心，因為今時已經唔同往日。

眼見 Diamond 黯然垂淚，Jackson 亦不好意思再說下去。

眼神閃縮，因為於心有愧。想捉住佢隻手安慰佢，但 Diamond 縮手。

Diamond 好不容易才走到呢一步，唔好再觸碰佢個傷口喇，否則一直都會無法癒合。

曾經有一份真摰嘅感情擺喺面前但無去珍惜，到無左先黎後悔。

曾經自大到以為可以魚與熊掌兼得，但其實通失。

雖然口講啱啱落機唔攰，但面容掩飾不了憔悴。

縱使千般不捨，但已經無力挽留。

每個人都有自己嘅軌道，相戀只係因為二人嘅軌道重叠。當軌道不再重叠，就是時候各行各路。

以前好瀟洒咁話食完枝事後煙就各行各路，因為一方面作為有婦之夫唔想有手尾跟，一方面好老定咁知道 Diamond 一定唔會離開佢。

到而家真係要各行各路，Jackson 神情落寞。

眼神閃縮，眼珠左碌右碌，因為於心有愧。男神唔係得個樣，眉頭額角都有戲。

演技好到可以一隻眼流淚

Home is where the heart is. He is no longer my home.

《瑪嘉烈與大衛系列﹣綠豆》：一刀兩斷 與 藕斷絲連

似唔似喺度告解？

Diamond 被成全，反而觸動左佢嘅惻隱之心，即使守得雲開見月明，往後都會活在陰影之中。電視入面嘅Diamond 比書入面嘅Diamond 討好，因為佢壞唔晒，唔算貪慕虛榮又無乜野心。

《瑪嘉烈與大衛系列﹣綠豆》呢套電視劇之所以好睇，選角選得好亦係好主要嘅因素。你以為廖碧兒飾演外表冶豔嘅Diamond 係壞女人，其實鱷魚頭老襯底。周家怡飾演外表爽朗嘅瑪嘉烈先至係最耍手段最虛偽。

之前有一篇寫過 Triangular Theory of Love 當中有包括 commitment。

雖然同大衛唔係合法夫妻，但二人同居多時，大衛早已有買樓填埋瑪嘉烈個名嘅打算，而且當談及買保險嘅話題時大衛毫不猶豫咁話會以未婚妻嘅名義寫瑪嘉烈為受益人，可見大衛早已認定瑪嘉烈，只係瑪嘉烈一向都唔重視與大衛之間嘅 commitment。

瑪嘉烈繼上次換鎖同雲吞攻勢失敗之後都未肯罷休，即使趙子龍托大衛將兩隻貓轉送俾佢都未識知難而退。今次佢向大衛重提及贊成買樓一事，其實係向趙子龍示威嘅手段。（就好似向所愛嘅人宣稱要同人結婚，希望睇下佢有幾著緊自己甚至搶新婚果類陳年舊橋。）將錢用黎買樓即係唔投資「我和你」嘅業務擴展，而認真嘅大衛覺得要跟趙子龍食飯當面正式答覆佢，瑪嘉烈堅持陪同大衛出席飯敍，示威之餘亦可以藉此一見迴避佢多時嘅趙子龍。

其實趙子龍已經唔在乎大衛投資與否，因為已經搵到大水喉而沾沾自喜。多謝瑪嘉烈，係多謝佢令佢識到Candy。餐飯入面瑪嘉烈趙子龍你一言我一語，毫無避忌當著大衛面前重提只有佢地至明白嘅曖昧事情，有骨落地。

寂寞時，心癢的瑪嘉烈又透過 whatsapp 撩人，玩法係 send 一啲模稜兩可嘅事物，但求引起對方注意搏取回應。趙子龍作為收放自如嘅專業玩家當然懂得婉轉地 turn off 佢，燒賣馬拉糕其實亦係多多少少，佢地嘅爸爸可以係指趙子龍又可以係大衛。趙子龍咁答，一方面四兩撥千斤將瑪嘉烈連人帶貓卸左俾大衛，一方面係賊佬試沙煲探聽大衛行踪，確保安全至繼續進一步對答。

現實中有唔少人好似佢地咁嘅 open relationship，副產品唔只係寵物，更甚至係子女。
玩還玩，唔好禍及無辜生命。

《瑪嘉烈與大衛系列﹣綠豆‬》：趙子龍呢條友

個個都話趙子龍其實係鍾意大衛，homosocial 其實係homosexual？呢點我有啲保留。

如果佢係鍾意大衛，點解由細到大都搵大衛笨呢？個心態係咪我搵你笨就得，其他人搵你笨就唔得？

我反而著眼嘅係趙子龍呢條友嘅為人。

飾演趙子龍父親嘅曾江，雖然有腦退化嘅跡象，但從佢成日loop住講嘅說話有啲線索可以參考。因為老婆最鍾意食鮑魚，所以為佢開左間鮑魚腸粉鋪，結果老婆都係走路。個仔鍾意食，個女又鍾意食，老婆都鍾意食，但自己最憎食鮑魚，有得揀寧願去雲吞麵鋪食雲吞。鮑魚無論喺而家定係果個年代都係奢侈品，可見佢嘅家人都係貪圖富貴嘅人。

趙子龍油腔滑調，對男人就游說合作搞生意，對女人就flirt。凡係識得趙子龍耐嘅人，都唔受佢果套，甚至睇佢唔起。只有大衛先至繼續由得佢喺身邊掩掩樣樣。識於微時俾佢搵笨搵得少咩，肯買七人車同佢夾份做生意主要都係順瑪嘉烈嘅意思。

卒之就乘虛而入搭上埋瑪嘉烈。佢係一隻無腳嘅雀仔，好聽啲講就係喺瑪嘉烈routine嘅感情生活泛起漣漪，難聽啲就係只會闖入別人嘅生活搞屎棍，輕挑的佢走了，揮一揮衣袖，留低一堆蘇州屎。瑪嘉烈就係衰進取，上得床黎牽被冚，喺外人面前自稱趙太，換門鎖意圖杜絕Candy。趙子龍只係曾經係咁二同大衛提過下屋企開雲吞麵店，但瑪嘉烈竟然認真到上佢屋企親手為佢包雲吞，錯晒！

至於繼續同Candy來往，只係因為可以喺佢身上攞著數，貪佢屋企有錢，可以借助佢父親搭上更多生意人脈。

其實趙子龍最愛嘅係佢自己。

我只係好奇點解作者以忠肝義膽嘅歷史人物趙子龍命名呢個角色。

《瑪嘉烈與大衛系列﹣綠豆》：攤牌

無止境  從熱吻中火拼  沉迷你至知大局已定
原本應該一早戒了還是不捨得我的尼古丁
多麼致命  還只好信命
輸給愛情  絕症
（節錄陳冠希《尼古丁》歌詞）


男人鍾意教女人食煙，就係想女人好似addicted to cigarette 咁樣 addicted to him。香煙入面嘅尼古丁會令人上癮，會不自覺地越食越多同埋越難戒得甩，而每次食煙就會諗起教佢食煙呢個男人，久而久之就對香煙不能自拔同樣對呢個男人死心塌地。

攤牌，鬧佢一餐？摑佢一巴？

今次約得佢出黎，顯然係經過深思熟慮，有嬲過，有恨過，有傷心過，總之最難過已經過左，我比我想像中冷靜，其實佢都唔見得好受，只怪我地愛上左一個其實怕選擇嘅男人。

《瑪嘉烈與大衛系列﹣綠豆》：Jean or Jenny? Why not both?

Jenny 為人理智，唔需要氹，無論喺工作上以至生活瑣事都可以多番提點佢，兩夫妻好有默契，不過就唔多了解佢喜好，同埋唔識煮飯。

而 Diamond (aka Jean) 俾到佢戀愛感覺，知道佢喜好，廚藝又了得，知佢鍾意食羊，呢樣咁考功夫同唔易煮得好食嘅野都肯為佢煮。（又或者應該話係 Diamond 專注鑽研各種興趣黎分散注意力令自己無咁唔開心嘅成果。）

老婆情人互補不足，Jackson 係唔會放棄任何一個。佢亦都自信有本事可以兼顧兩邊，駕馭得游刃有餘。當然“成功”男人背後靠老婆隻眼開隻眼閉以及情人默默忍讓至可以維持融洽嘅局面。

必要時 Jackson 會選擇犧牲情人，從佢平時對 Diamond 呼之則來揮之則去可見一斑。三人同枱食飯，分鏡往往係 Jenny 同 Jackson 一個 shot，Diamond 獨立一個 shot。兩公婆有講有笑，而 Diamond 則大部分時間都係似搭枱。 Diamond 一啲都唔好受，但因為愛 Jackson，愛到包括可以為佢做一啲自己唔想做嘅野——同 Jenny 成為好友免被懷疑。

終日患得患失，受盡委屈嘅 Diamond 終於鼓起勇氣離開，但 Jackson幾句花言巧語加隻戒指就將呢鼓勇氣擊破。 Diamond 選擇相信，未必因為佢蠢，而係因為太愛呢個男人。

《瑪嘉烈與大衛系列﹣綠豆》：最愛是誰

Jackson揀花呢一幕，令我諗起柏拉圖與蘇格拉底嘅對話。

有一日，柏拉圖問佢老師蘇格拉底：「咩係愛情？」
蘇格拉底就叫佢去麥田摘一枝最靚嘅麥穗返黎，其間不准調頭淨係可以向前行，而且只可以摘一次。
柏拉圖以為好容易，點知最後空手而回，佢話:「曾經見到一枝唔錯嘅， 但因為得一次機會，我諗住繼續行會搵到更好啦，點知已經搵極都搵唔番咁好喇，結果咪乜都無摘到囉。」
蘇格拉底就話：「咁咪就係愛情囉。」
（成日諗住下一個會更好，往往錯過左先至識後悔。）

又有一日，柏拉圖問蘇格拉底：「咩係婚姻？」
今次蘇格拉底叫佢去樹林斬一棵最好嘅的樹返黎，又係唔准調頭同埋只可以揀一次。
柏拉圖今次帶左棵樹返黎，但唔算得上係茂盛。
蘇格拉底問：「呢碌就係最好？」
柏拉圖答：「唔係呀，但唔想好似上次咁空手而回吖嘛，所以求其搵住一棵起碼有野揸手囉。」
蘇格拉底就話：「咁咪就係婚姻囉。」
（同你結婚嘅未必係你最愛嘅一個，只係理智權衡作出嘅妥協。）

又有一日，柏拉圖問蘇格拉底 ：「咩係外遇？」
蘇格拉底又叫佢去樹林搵一朵最靚嘅花返黎，今次點行都得。
吸取左之前嘅經驗，柏拉圖今次好快就拎左一朵嬌豔欲滴但有啲枯乾嘅花返黎。
蘇格拉底問：「呢朵就係最靚嘅花？」
柏拉圖答：「係呀，我係搵到呀，但摘左之後行到半路已經開始謝喇。」
蘇格拉底就話：「咁咪就係外遇囉。 」
（外遇係美麗，誘惑而短暫。）

《瑪嘉烈與大衛系列﹣綠豆》：Self-defense Mechanism

旁白林海峰話：「當發現自己變左心，可能或者會覺得內疚，但你最想嘅唔係向情人坦白，而係希望對方同你一樣，愛上另外一個。」

當觀眾都以為睇個勢大衛會同Diamond一齊瞓，但大衛依然正襟危坐，脫下嘅只係平日扮無事嘅外表，坦露自己嘅心理狀態。我越受害越顯得清高，咁樣只會顯得瑪嘉烈同趙子龍更加可恥。

林海峰用詞「可能或者會覺得內疚」，即係內疚嘅機會好微。佢地有好強嘅self-defense mechanism*，趙子龍先發制人先虛構自己嘅感情狀況，再而問大衛接唔接受到瑪嘉烈同人one-night-stand，更主動講自己當晚同瑪嘉烈睇戲(所講屬實但沒有透露事實之全部)。瑪嘉烈特登做平時唔做嘅家務，煲大衛鍾意食嘅粥，講番當日嘅事亦都理直氣壯，二人不約而同借Candy過橋(不約而同唔係不謀而合)，喂要呃人都作個好啲嘅大話吖。

而大衛竟選擇相信，佢真係好愛瑪嘉烈，好怕失去瑪嘉烈，啞忍程度十足粵語殘片嘅慘情家嫂。

• Self-defense Mechanism 心理防衛機制/自我防衛機制： 心理學上指人類為了避免精神上的痛苦、緊張焦慮、尷尬、罪惡感等心理，有意無意間會運用各種自我防衛機制，令心理上感覺良好一點。以瑪嘉烈和趙子龍為例，對伴侶不忠／撬朋友牆腳都是不道德的事，所以二人做出上述自欺欺人的行為，意圖掩飾真相。

《瑪嘉烈與大衛系列﹣綠豆》：Triangular Theory of Love

Jackson：「我會搵個機會同佢講架喇，等多我一陣啦好嗎？ I promise.」
Diamond：「其實你知唔知乜野係promise?」

Source: http://www.loveanon.org/2011/09/theory-of-love-pt-2-sternbergs.html

心理學Triangular theory of love話愛情包括三個元素：Intimacy，Passion，Commitment。

Diamond 同 Jackson 嘅關係最欠缺嘅就係承諾。

或者初時都仲係有Intimacy有Passion嘅Romantic Love，

‪好比火星跟水星相戀有過燦爛影蹤‬

但而家恐怕只餘下Passion......

‪今天儘管可始終相擁眼裡卻沒溝通‬

（節錄陳奕迅《黑洞》歌詞）

《瑪嘉烈與大衛系列﹣綠豆》：香港電視史上罕有的拍攝角度

Diamond雖然講到自己一個人行街幾咁寫意，但其實等緊自己所在乎嘅人約佢。畫面顯出獨對空櫈嘅寂莫。

《瑪嘉烈與大衛系列﹣綠豆》：茶餐廳

茶餐廳撞過正著一幕，俾著係大台拍，肯肯定一手攞起枱面杯水就淋過去，搲爛塊面炒大鑊。

大衛同趙子龍不約而同揀番去平時聚腳嘅茶餐廳，明顯兩人都無諗過約會唔見得光而刻意避忌，而家輕輕掩飾就帶過，表面越無事其實越蘊藏暗湧，積積埋埋遲早爆煲。

《‪瑪嘉烈與大衛系列‬﹣綠豆》：林海峰畫龍點睛的總結

林海峰嘅總結最畫龍點睛。

瑪嘉烈同趙子龍雖然無做啲咩越軌行為，但精神上已經出晒軌，因為心虛所以想為大衛做番啲野，即使只係煎隻蛋，起碼心靈上有啲救贖。

大衛同Diamond亦都無越軌行為，但始終係因為Diamond而放瑪嘉烈飛機(雖然佢都係被老點)，其實都唔想食Diamond餐飯，不過好好先生又唔好意思拒絕，所以返到屋企就算唔餓都想食啲野蓋過頭先餐飯嘅記憶。

不過有路係遲早嘅事，亦唔怪得邊個，畢竟一開始已經覺得瑪嘉烈同大衛根本就唔夾，瑪嘉烈吊兒啷噹，大衛安安份份。即係有次一對搭的士嘅男女乘客講嘅野咁，我只係鍾意你鍾意我囉，係好可悲。

總有出頭天

最近港台電視31重播《總有出頭天》，雖然係重播(2014年出街嘅)，不過我覺得好好睇喎。

劇中各人都因為各種原因而去做地盤。（做地盤只是一個統稱，其實細分有不同工種。）總之除了女主角夏雪琪之外，做地盤都不是他們的第一志願。其中我們熟識的唐寧，其實還算後生，但在劇中已經被稱為「師奶」，要面對離婚及經濟的問題。每天穿得斯斯文文OL般回到地盤，原來是為了瞞住母親，以為她仍在做以前那份office工。

當中每個角色分別帶出了職業、世代、性別及少數族裔的偏見：

大學生看不起修讀職業訓練的學生；

地盤整個行業被人看不起；

地盤入面老一輩又看不起後生一輩；

地盤這個男性主道的圈子又看不起女人；

地盤工作的少數族裔更加被人看不起等等。

我們這一代，小時候大人總是對你說：「要俾心機讀書，大個可以做啲舒舒服服坐office嘅工(即係所謂嘅白領)；唔讀書就做啲出賣勞力嘅低下工作啦(即係藍領)。」不過出來工作之後，你會發現人浮於事，所謂白領其實都不外如是，都是做到「隻積咁」，人工跟不上通脹。office工作未必比藍領好，刻薄之餘甚至職安意識比藍領更差。藍領的工種反而因為慌死沒有人做，人工不跌反升。

若果如功能學派(functionalist perspective) 所說，社會是一台大型機器，每個人是一粒小零件，各人各自在崗位發揮所長，同樣重要。用這個職業無分貴賤的理論來解釋不應該存有偏見尚算合理。不過想深一層，以馬克斯主義(Marxism)來看，白領不見得比藍領高尚，兩者其實都不過是資本家的工具，被剝削的一群。（所謂 Human Resources 咪就係當你係資源囉，你估當你係人呀？）藍領人工比較高，只因資本家對這類勞動力的需求比較大。如今地產霸權張牙舞爪，周圍大興土木，正值用人之時。到工程完成，資本家又會藉詞恐防這班工人會失業，促請政府開發更多大型基建項目以提供就業機會。說穿了，最大得益者始終是資本家。

姑勿論現實如此殘酷，這套劇為社會上一些缺乏優勢的人呈現出較深層的描寫，令戲裏戲外本來看不起他們的人另眼相看。

出淤泥而不染的夏雪琪，從小已經不是社會定義的典型女孩，有清晰的目標。要在男性主導的行業中打拼，所下的苦工必定要比別人多。的而且確她的工作能力比劇中幾位男主角還要強，更加打破地盤常規，為工友爭取更多福利而得到老闆及老一輩認同。

同為女性亦會看不起女性，爽直強悍的雪琪戲謔曾美麗是個師奶。失婚失業的美麗轉做地盤，由得不到母親和朋友的睇好，到漸漸略有所成。雖然又因沒有相關的大學學歷加上年紀不小而面臨樽頸，但很快想通自己的方向，不受世俗的觀念所局限。

黎大志與Raymond都喜歡雪琪，雪琪要作出決擇的同時，亦讓觀眾看到黎大志同Raymond的對比。雖然沒有直接交代Raymond的家庭背景，但觀其朋友圈得知他們屬上流社會的一群。他是草地曲棍球隊長，大學風頭躉。曲棍球是一種不太大眾化的運動，一般人對這種運動認識不多，所需裝備亦並非人人負擔得起。與雪琪參觀示範單位一幕，顯出他為人不切實際。志願從事投資銀行業，於中環上班。覺得高樓大廈是建築師的功勞，無視建築工人的存在及重要。從以上種種不難想像，他日後必會成為堅離地中產。他是喜歡雪琪的，但不支持雪琪所想所做的事，二人無論階級及思想都有很大分歧。他需要的是一個千依百順又不失禮的女朋友，寧願女友不工作都不想她是自食其力做地盤的。如果雪琪繼續跟Raymond一齊，相信將來都會生活無憂，甚至連父母的生活環境都會得到改善。Raymond會對她及其家人好的，不過目中無人的他永遠都看不起她們。這種subordinate的從屬關係不會是雪琪想過的生活。

黎大志由一個呆頭呆腦跑唔到數的地產從業員到轉行學搭棚，由畏高到克服再頂手工程公司成為老闆，雪琪是他奮勇向上的原動力。他對雪琪一心一意，把自已所有毫無保留地奉獻給她。即使自己所沒有，都會盡自己所能去爭取最好的給她。他對雪琪的愛包括尊重及欣賞。二人在工作上遇到問題會互相傾訴分憂，一同努力，一同進步。夏雪琪跟黎大志一起可以建立出真正的幸福。

Kai少kai得很可愛。雖然與Raymond同是家境富裕，但Kai少的爸爸靠做地盤白手興家才有今日的成就。Raymond是順理成章走家庭薰陶的路，而到外國讀書的Kai少或許都會變成Raymond同一類人，可是反叛的Kai少半途而廢。他有苦榮的影子，終日想威想吐氣揚眉，但常常撞板。有品學兼優的妹妹更令他相形見絀。其實他並非如別人所標籤的廢青那樣不堪，只不過往往要加以激發才能迫出潛能。他是個喜歡自我陶醉嘅drama king，懂得苦中作樂也是他的可愛之處。

小強是「真．香港人」！劇情安排出國比賽獲獎的是他，因為要透過比賽證明他的實力，以香港代表的身份到外國參賽，人在他方更加需要確立自己的身份。（情況就像你在學校根本不用刻意跟人說你是學生，反而在學校以外如搭地鐵食飯唱K才要表明學生身份。）小強就像我們這一群祖籍番禺順德中山新會......但在香港土生土長的香港人。對自己鄉下沒太大感覺，無論持有的身份證明文件及文化身份認同上，都認為自己是香港人。或許有些港人會因為香港不景氣，沒有發展機會而選擇移民，但小強堅持留在香港，豈不是比香港人更香港人嗎？

P.S. 韋家雄演地盤佬入型入格。相比之下，林子善一身肌肉似是做gym練出來多過似勞動階層那種鋼條身型。

《總有出頭天》第一至七集

http://dct.etvonline.hk/epi.html

《總有出頭天II》第一至三集

http://podcast.rthk.hk/podcast/item_all.php?pid=765&current_year=2014

《總有出頭天II》第四至六集

http://podcast.rthk.hk/podcast/item_all.php?pid=765&current_year=2015