自從小克位公子出左世之後，都好耐無見過佢喇。今次展覽係佢喺深圳大芬村(一個刻板式大量生產油畫嘅地方)買入一批風景畫返黎加以二次創作。顧名思義，「Affordable Art」即係價錢可負擔得起嘅藝術，以藝術品黎講真係唔算貴，我負擔唔起只不過係我窮姐。而「Art Like」與「呃Like」同音，正正就係當今社交媒體流行所衍生出嘅文化，所以之前佢喺IG post左一幅畫，叫我地俾Like，原來就係將engagement畫埋落幅畫度，構成作品嘅一部份。成件事好係呢個年代嘅野。
同場仲有當年喺《東Touch》刊登嘅漫畫原稿，網上有人問佢捨得架喇？佢話要幫個仔交學費。講真要搵錢大可以用聾貓BitBit出一大堆精品，但始終畫先係有感覺有生命，係作者同受眾最close嘅心靈交流。睇完呢個展覽好治癒好開心，今年係非常壞嘅一年，天災人禍特別多，香港真係好需要你呀小克！
展覽有梁栢堅同Paul Lung 負責睇場，當小克密密手簽名嘅時候，梁栢堅揸住杯紅酒滿場飛邊飲邊招呼人，Paul Lung 喺reception 主持大局，同人吹水又一眼關七𥄫住啲原稿。咁好嘅朋友去邊度搵呀～
日期：19/12/2018 - 6/1/2019
時間：11am - 10pm
地點：尖沙咀海港城Gallery by the Harbour
P.S. 第一日21幅畫已經賣出左15幅，有人問咁賣一幅咪少一幅睇囉？
唔係。同好多會出售藝術展品嘅展覽一樣，已售嘅展品會繼續展出，只係會喺展品旁邊註明“Sold”嘅字眼，直到展期完結先至會將展品送到買家手上。
