《瑪嘉烈與大衛系列﹣綠豆‬》：趙子龍呢條友

個個都話趙子龍其實係鍾意大衛，homosocial 其實係homosexual？呢點我有啲保留。

如果佢係鍾意大衛，點解由細到大都搵大衛笨呢？個心態係咪我搵你笨就得，其他人搵你笨就唔得？

我反而著眼嘅係趙子龍呢條友嘅為人。

飾演趙子龍父親嘅曾江，雖然有腦退化嘅跡象，但從佢成日loop住講嘅說話有啲線索可以參考。因為老婆最鍾意食鮑魚，所以為佢開左間鮑魚腸粉鋪，結果老婆都係走路。個仔鍾意食，個女又鍾意食，老婆都鍾意食，但自己最憎食鮑魚，有得揀寧願去雲吞麵鋪食雲吞。鮑魚無論喺而家定係果個年代都係奢侈品，可見佢嘅家人都係貪圖富貴嘅人。

趙子龍油腔滑調，對男人就游說合作搞生意，對女人就flirt。凡係識得趙子龍耐嘅人，都唔受佢果套，甚至睇佢唔起。只有大衛先至繼續由得佢喺身邊掩掩樣樣。識於微時俾佢搵笨搵得少咩，肯買七人車同佢夾份做生意主要都係順瑪嘉烈嘅意思。

卒之就乘虛而入搭上埋瑪嘉烈。佢係一隻無腳嘅雀仔，好聽啲講就係喺瑪嘉烈routine嘅感情生活泛起漣漪，難聽啲就係只會闖入別人嘅生活搞屎棍，輕挑的佢走了，揮一揮衣袖，留低一堆蘇州屎。瑪嘉烈就係衰進取，上得床黎牽被冚，喺外人面前自稱趙太，換門鎖意圖杜絕Candy。趙子龍只係曾經係咁二同大衛提過下屋企開雲吞麵店，但瑪嘉烈竟然認真到上佢屋企親手為佢包雲吞，錯晒！

至於繼續同Candy來往，只係因為可以喺佢身上攞著數，貪佢屋企有錢，可以借助佢父親搭上更多生意人脈。

其實趙子龍最愛嘅係佢自己。

我只係好奇點解作者以忠肝義膽嘅歷史人物趙子龍命名呢個角色。