《綠豆中的瑪嘉烈‬》：Who's bad?

悶左成晚，就係鋪呢一幕。（一路只係片段重播真係差點要𠝹櫈）

趙子龍成個救世者判官咁，企喺道德高地狠狠給瑪嘉烈一個教訓。
其身不正又有咩資格教訓人？
五十步笑百步嘅係瑪嘉烈定係趙子龍？
抑或正正因為趙子龍唔係善男信女，所以佢最懂得用咩方法對付瑪嘉烈呢種朝秦暮楚嘅人？

《瑪嘉烈與大衛系列﹣綠豆》：一刀兩斷 與 藕斷絲連

似唔似喺度告解？

Diamond 被成全，反而觸動左佢嘅惻隱之心，即使守得雲開見月明，往後都會活在陰影之中。電視入面嘅Diamond 比書入面嘅Diamond 討好，因為佢壞唔晒，唔算貪慕虛榮又無乜野心。

《瑪嘉烈與大衛系列﹣綠豆》呢套電視劇之所以好睇，選角選得好亦係好主要嘅因素。你以為廖碧兒飾演外表冶豔嘅Diamond 係壞女人，其實鱷魚頭老襯底。周家怡飾演外表爽朗嘅瑪嘉烈先至係最耍手段最虛偽。

之前有一篇寫過 Triangular Theory of Love 當中有包括 commitment。

雖然同大衛唔係合法夫妻，但二人同居多時，大衛早已有買樓填埋瑪嘉烈個名嘅打算，而且當談及買保險嘅話題時大衛毫不猶豫咁話會以未婚妻嘅名義寫瑪嘉烈為受益人，可見大衛早已認定瑪嘉烈，只係瑪嘉烈一向都唔重視與大衛之間嘅 commitment。

瑪嘉烈繼上次換鎖同雲吞攻勢失敗之後都未肯罷休，即使趙子龍托大衛將兩隻貓轉送俾佢都未識知難而退。今次佢向大衛重提及贊成買樓一事，其實係向趙子龍示威嘅手段。（就好似向所愛嘅人宣稱要同人結婚，希望睇下佢有幾著緊自己甚至搶新婚果類陳年舊橋。）將錢用黎買樓即係唔投資「我和你」嘅業務擴展，而認真嘅大衛覺得要跟趙子龍食飯當面正式答覆佢，瑪嘉烈堅持陪同大衛出席飯敍，示威之餘亦可以藉此一見迴避佢多時嘅趙子龍。

其實趙子龍已經唔在乎大衛投資與否，因為已經搵到大水喉而沾沾自喜。多謝瑪嘉烈，係多謝佢令佢識到Candy。餐飯入面瑪嘉烈趙子龍你一言我一語，毫無避忌當著大衛面前重提只有佢地至明白嘅曖昧事情，有骨落地。

寂寞時，心癢的瑪嘉烈又透過 whatsapp 撩人，玩法係 send 一啲模稜兩可嘅事物，但求引起對方注意搏取回應。趙子龍作為收放自如嘅專業玩家當然懂得婉轉地 turn off 佢，燒賣馬拉糕其實亦係多多少少，佢地嘅爸爸可以係指趙子龍又可以係大衛。趙子龍咁答，一方面四兩撥千斤將瑪嘉烈連人帶貓卸左俾大衛，一方面係賊佬試沙煲探聽大衛行踪，確保安全至繼續進一步對答。

現實中有唔少人好似佢地咁嘅 open relationship，副產品唔只係寵物，更甚至係子女。
玩還玩，唔好禍及無辜生命。

《瑪嘉烈與大衛系列﹣綠豆‬》：趙子龍呢條友

個個都話趙子龍其實係鍾意大衛，homosocial 其實係homosexual？呢點我有啲保留。

如果佢係鍾意大衛，點解由細到大都搵大衛笨呢？個心態係咪我搵你笨就得，其他人搵你笨就唔得？

我反而著眼嘅係趙子龍呢條友嘅為人。

飾演趙子龍父親嘅曾江，雖然有腦退化嘅跡象，但從佢成日loop住講嘅說話有啲線索可以參考。因為老婆最鍾意食鮑魚，所以為佢開左間鮑魚腸粉鋪，結果老婆都係走路。個仔鍾意食，個女又鍾意食，老婆都鍾意食，但自己最憎食鮑魚，有得揀寧願去雲吞麵鋪食雲吞。鮑魚無論喺而家定係果個年代都係奢侈品，可見佢嘅家人都係貪圖富貴嘅人。

趙子龍油腔滑調，對男人就游說合作搞生意，對女人就flirt。凡係識得趙子龍耐嘅人，都唔受佢果套，甚至睇佢唔起。只有大衛先至繼續由得佢喺身邊掩掩樣樣。識於微時俾佢搵笨搵得少咩，肯買七人車同佢夾份做生意主要都係順瑪嘉烈嘅意思。

卒之就乘虛而入搭上埋瑪嘉烈。佢係一隻無腳嘅雀仔，好聽啲講就係喺瑪嘉烈routine嘅感情生活泛起漣漪，難聽啲就係只會闖入別人嘅生活搞屎棍，輕挑的佢走了，揮一揮衣袖，留低一堆蘇州屎。瑪嘉烈就係衰進取，上得床黎牽被冚，喺外人面前自稱趙太，換門鎖意圖杜絕Candy。趙子龍只係曾經係咁二同大衛提過下屋企開雲吞麵店，但瑪嘉烈竟然認真到上佢屋企親手為佢包雲吞，錯晒！

至於繼續同Candy來往，只係因為可以喺佢身上攞著數，貪佢屋企有錢，可以借助佢父親搭上更多生意人脈。

其實趙子龍最愛嘅係佢自己。

我只係好奇點解作者以忠肝義膽嘅歷史人物趙子龍命名呢個角色。

《瑪嘉烈與大衛系列﹣綠豆》：Self-defense Mechanism

旁白林海峰話：「當發現自己變左心，可能或者會覺得內疚，但你最想嘅唔係向情人坦白，而係希望對方同你一樣，愛上另外一個。」

當觀眾都以為睇個勢大衛會同Diamond一齊瞓，但大衛依然正襟危坐，脫下嘅只係平日扮無事嘅外表，坦露自己嘅心理狀態。我越受害越顯得清高，咁樣只會顯得瑪嘉烈同趙子龍更加可恥。

林海峰用詞「可能或者會覺得內疚」，即係內疚嘅機會好微。佢地有好強嘅self-defense mechanism*，趙子龍先發制人先虛構自己嘅感情狀況，再而問大衛接唔接受到瑪嘉烈同人one-night-stand，更主動講自己當晚同瑪嘉烈睇戲(所講屬實但沒有透露事實之全部)。瑪嘉烈特登做平時唔做嘅家務，煲大衛鍾意食嘅粥，講番當日嘅事亦都理直氣壯，二人不約而同借Candy過橋(不約而同唔係不謀而合)，喂要呃人都作個好啲嘅大話吖。

而大衛竟選擇相信，佢真係好愛瑪嘉烈，好怕失去瑪嘉烈，啞忍程度十足粵語殘片嘅慘情家嫂。

• Self-defense Mechanism 心理防衛機制/自我防衛機制： 心理學上指人類為了避免精神上的痛苦、緊張焦慮、尷尬、罪惡感等心理，有意無意間會運用各種自我防衛機制，令心理上感覺良好一點。以瑪嘉烈和趙子龍為例，對伴侶不忠／撬朋友牆腳都是不道德的事，所以二人做出上述自欺欺人的行為，意圖掩飾真相。

《瑪嘉烈與大衛系列﹣綠豆》：茶餐廳

茶餐廳撞過正著一幕，俾著係大台拍，肯肯定一手攞起枱面杯水就淋過去，搲爛塊面炒大鑊。

大衛同趙子龍不約而同揀番去平時聚腳嘅茶餐廳，明顯兩人都無諗過約會唔見得光而刻意避忌，而家輕輕掩飾就帶過，表面越無事其實越蘊藏暗湧，積積埋埋遲早爆煲。

《‪瑪嘉烈與大衛系列‬﹣綠豆》：林海峰畫龍點睛的總結

林海峰嘅總結最畫龍點睛。

瑪嘉烈同趙子龍雖然無做啲咩越軌行為，但精神上已經出晒軌，因為心虛所以想為大衛做番啲野，即使只係煎隻蛋，起碼心靈上有啲救贖。

大衛同Diamond亦都無越軌行為，但始終係因為Diamond而放瑪嘉烈飛機(雖然佢都係被老點)，其實都唔想食Diamond餐飯，不過好好先生又唔好意思拒絕，所以返到屋企就算唔餓都想食啲野蓋過頭先餐飯嘅記憶。

不過有路係遲早嘅事，亦唔怪得邊個，畢竟一開始已經覺得瑪嘉烈同大衛根本就唔夾，瑪嘉烈吊兒啷噹，大衛安安份份。即係有次一對搭的士嘅男女乘客講嘅野咁，我只係鍾意你鍾意我囉，係好可悲。