工業化初期，清教徒有一種救贖嘅焦慮(salvational anxiety)，個個都係罪人，要緩和焦慮就要就要自我克制、延遲享樂同埋刻苦耐勞黎贖罪。要先辛苦工作之後至可以享受回報 (effort before reward)。呢種先苦後甜嘅清教徒道德標準(Protestant ethic) 令人安份咁做一個服從嘅勞工，同資本主義(capitalism) 雙劍合碧影響好多工業化嘅社會。大眾嘅觀念普遍覺得借錢係先洗未來錢，唔踏實，好唔掂。而放債人一向都被標籤為大耳窿、九出十三歸、聯想到黑社會、惡形惡相、紋身大漢淋紅油……
今時今日，資本家對人民嘅剝削，已經由勞動層面伸展到消費層面。由強硬嘅壓榨變到溫柔嘅蠶食，鼓吹消費享樂(reward before effort)，洗左先，碌卡囉，借錢買樓係好閒嘅事。工作係為左還卡數，供樓，係之前享樂嘅代價，先甜後苦。安信與你稱兄道弟，邦民女夠體貼……一切都係情感包裝。哥倫布咁叻嘅人，佢嘅鴻圖大計都要靠「情深義重」嘅女皇資助先至成功，借錢嘅唔代表係失敗者，放數嘅都唔一定係壞人 (追數果時就唔知喇)。
之前喺彼思動畫研討會聽過講者話“story is the king”，幾好技術都好，故事先係最緊要，有theme先至係靈魂。時裝唔同服裝 (曾經同讀fashion design嘅朋友傾計，發覺佢地強調時裝同服裝嘅分別，服裝functional為主，著得上身嘅衫就係喇；而時裝係藝術，講求設計意念，有態度風格，有潮流嘅。) 一個品牌一季嘅collection都要有靈魂，而家就似乎魂魄唔齊咁。
童年回憶，反映出海港城都算係香港同級數商場之中歷史較悠久嘅商場 (不過透過裝修及不斷擴張，沒有老化嘅感覺)。加上五枝旗桿就係呢個商場嘅特色，(八九十年代好興約喺果度等人，亦有唔少電視電影有呢個橋段)。而家商場來來去去都係果d店鋪，尤其近年尖沙咀有不少新商場冒起，海港城更加要強調其獨特性，「一個海港，只有一個海港城。」面向維多利亞港，停泊著大型遊輪，優越嘅地理位置，唔會同其他商場混淆。「第一次出糧，買錶俾自己。」有意義有紀念嘅消費。「撞到朋友」，反映呢個商場嘅大眾化，你同我都會去果度留連，所以唔難撞到。「撞到明星」，明星係一個fantasy嘅identity，亦反映商場嘅高檔。因為高檔，所以明星都會黎。就算你未真係撞過，你都會憧憬撞到。廣告中係taken for granted嘅異性戀意識形態。「你係鍾意呢度嘅」男聲讀白由女聲回應；女聲讀白由男聲回應。「我愛你」無清楚交代「你」是誰，可以係人，係自己嘅另一半，亦都可以係地方，(呼應之後的一句「你係鍾意呢度嘅」)，任由觀眾自行解讀。廣告營造紫醉金迷嘅氣氛，衣著打扮華麗得有點不現實(有幾可見到行街嘅人係著成咁先)，拎住大抽氫氣球，翻飛嘅棉花糖，倒數嘅煙花……令你對呢個地方充滿fantasy。
