從《義不容情》到《是咁的，法官閣下》

《義不容情》太沉重，開套輕鬆啲嘅黎睇。

《是咁的，法官閣下》，一開頭主題曲又係《壹號皇庭》feel，但分別在於《壹號皇庭》故事圍繞一班中產成日去蒲嘅律司，而《是咁的，法官閣下》焦點則集中喺一班新晉律司。承接《跳躍生命線》，都係以新一輩演員擔正嘅劇集（雖然係新一輩但可能唔聲唔聲都入左行十年），大台多人走都好吖，佢地終於有多啲機會。

劇中常出現唔少航拍片段，用鳥瞰角度拍攝出香港大廈林立嘅日與夜，包括政總，甲級商廈，豪宅。。。心諗呢套劇如果好似《義不容情》咁廿年後再重播，又將會係一個歷史見證。

《義不容情》果個年代好窮，生活艱苦，但只要肯努力拼搏，係會有向上爬嘅機會(social mobility)。家中長子長女多數會比較顧家，往往好早就輟學出黎打工，所以細佬妹嘅經濟環境會相對地好啲，受教育嘅機會大啲，可以考上大學。知識改變命運，入到大學就係天之驕子，成為社會嘅精英(Elite)，就好似考入港大法律系嘅丁有康咁。

相比之下，而家嘅《是咁的，法官閣下》同樣係讀法律出身嘅年青人，依然係搵朝唔得晚，要為有無case接，有無錢交租而擔憂，日捱夜捱賺埋除番開時薪可能都唔及最低工資。此外，劇中隱約提及雨傘運動，黎振燁飾演嘅新晉律司枱頭錶起一張毋忘初衷嘅黃色memo紙，感慨話如果唔係呢件事，可能仲做緊政府工，而家已經做緊副局長。而且劇入面其中一宗要審訊嘅案件，係關於大學生喺校園示威，被告(吳偉豪飾)為左要求與校方對話而衝擊保安防線，損毀玻璃門，被控刑事毀壞等多項罪名。徒弟王梓軒問師傅關禮傑，呢單case唔算複雜，但點解律政署都要搵你做檢控官呢？關禮傑答近年特別多呢類case，如果處理得唔好，會加劇社會分裂。被告同爺爺哭訴自己俾人拉唔係做壞事。。。而家唔到佢安份守己，樣樣野都要靠自己爭取番黎，如果唔係就逐啲俾人搶走晒啲野。。。

所以呢套都算係值得睇嘅貼地之作，仲有另一亮點係譚玉瑛姐姐做奸角呀！

The American First Key Opinion Lady

2016年尾睇到《Jackie》嘅trailer，Natalie Portman演甘迺迪夫人（Jacqueline Bouvier Kennedy），就俾個題材所吸引。外國早喺12月上映，而香港就等到2月至有得睇。

Jackie 係外國人習慣對 Jacqueline 嘅簡稱，亦係戲中身邊人對甘迺迪夫人嘅匿稱。可能考慮到喺東方市場嘅認知唔夠廣泛，所以黎到香港上映嘅時候，用一個穩穩陣陣嘅中文名 ——《第一夫人：積琪蓮．甘迺迪》。

講真，Natalie Portman 其實唔算似到十足十。不過如果你讀過 Social Constructionism 或者 Discourse theory，真相其實無法知道，每個人（即使親身經歷）都只會得到從佢個人嘅角度所認知嘅「真相」。至於邊個「真相」比較可信，令人信以為真，往往好視乎邊個講法能夠廣泛流傳，或者係咪出自有公信力嘅人，例如 Key Opinion Leader。 （所指嘅係真係德高望重有真知灼見嘅人，唔係而家變晒質借啲二呃飲呃食嘅 so-called KOL。）

積琪蓮甘迺迪算係果個年代好早識得管理形象同公共關係嘅表表者。作為公眾人物，佢懂得保護子女私隱嘅同時亦會安排專人為子女拍照定期公開發佈。而且更親自出鏡帶電視台拍攝佢重新精心佈置過嘅白宮，向美國以至世界各地嘅電視觀眾展示美國象徵，鞏固美國人嘅身份認同。

即使全身穿紅，都唔會俾人覺得似龍蝦。#氣質很重要

(Source: John F. Kennedy Presidential Library and Museum)

鍾意時裝，唔一定要舉高隻腳擺上枱俾人睇。積琪蓮甘迺迪係帶領潮流嘅 fashion icon，由髮型（bouffant）到衣著（中袖及膝裙套裝）都令當時女性爭相模仿，時至今日仍為好多時裝雜誌所津津樂道。鍾情Chanel，Dior等法國品牌，亦都請法國出生嘅美國設計師 Oleg Cassini 為佢度身訂造一整個第一夫人衣櫃嘅衫。1965年更榮登The International Best Dressed List: The International Hall of Fame，好多經典服飾其後被收藏於甘迺迪總統圖書博物館（John F. Kennedy Presidential Library and Museum）。

而今次《Jackie》呢套電影亦都情商多個品牌借出或復刻積琪蓮甘迺迪嘅服裝及珠寶，成為話題之一。Trailer 開頭就見到 Natalie Portman 身穿一套粉紅色 Chanel 套裝配圓形禮帽（pillbox hat），正正就係積琪蓮喺甘迺迪總統遇刺時所穿嘅打扮。事發時就坐喺丈夫身旁，臉上同衣服都沾染左丈夫嘅血跡，但佢由陪伴丈夫入手術室，到丈夫證實死亡後，副總統林登宣誓接任總統一職，都堅持唔換衫同埋唔抹走面上嘅血跡。因為佢想讓世人看到兇手做左啲乜，就好似而家所講嘅 #有圖有真相 咁樣。

時值廣播（media boardcast）興起，電視機普及，世界各地都可以透過電視螢光幕睇到佢嘅影像，仿佛無處不在，聲音纏繞不散。正如同年代嘅 Pop Art 藝術家 Andy Warhol 話過：

“He (John Kennedy) was handsome, young, smart, but it didn't bother me that much that he was dead … What bothered me was the way television and radio were programming everybody to feel so sad. It seemed like no matter how hard you tried, you couldn't get away from the thing." (Binlot, 2014)

Source: W Magazine

纏擾 Andy Warhol 嘅唔係事件本身，而係媒體渲染嘅衰傷，所以其後佢有一系列作品就用左絲網印刷技術複印積琪蓮嘅頭像，就好似經過電器鋪見到所有電視都播放住積琪蓮咁。以未忘人身份主導喪禮，頭披黑紗，拖住一對年幼子女，帶領喪禮隊伍緊隨靈柩，護送甘迺迪最後一程...... 一切一切都成為傳媒嘅焦點以及世人歷歷在目嘅畫面，呢位第一未忘人實在難以被忘記。倫敦晚報（The London Evening Standard）更形容佢喺喪禮建立出美國人缺乏嘅皇室形象（Majesty）。

雖然唔會盡信電影係史實，但正好為歷史嘅空白地方作補充，作為參考亦都唔錯。

Natalie Portman 演繹出 Jackie 心理嘅複雜多變，時而驚慌，時而呆滯，時而崩潰，時而冷靜，時而衰傷，時而失常，時而堅強，時而脆弱，時而執著，時而忐忑，時而彷徨，時而自戀，時而挑剔，時而虛榮...... 反映出第一夫人都係人，都有陰暗面。佢清楚自己甘迺迪夫人嘅身份，咁無左甘迺迪，佢又算得係咩呢？

「大江東去，浪淘盡，千古風流人物」佢明白人走茶涼呢個道理，歷史人物如恆河沙數，淨係美國總統都咁多個，點樣可以喺歷史洪流佔一席位？戲中 Jackie 說： "People like to believe in fairytales"，佢都擔心自己會一無所有，日後無可依靠，好驚會步林肯遺孀嘅後塵。與其活得潦倒，不如一死了之。經過內心多番掙扎之後，最終力排眾議主導策劃喪禮，為甘迺迪嘅輝煌傳奇更添色彩，其實亦都為左自己。要俾世人睇到佢孤兒寡婦嘅可憐，由憐生愛，念念不忘。

戲中經常穿插電視影像，模仿當時電視播放嘅畫面，對於我地而家高清年代黎講，聲音畫質實在太失真，但當時嘅人認為電視所播放嘅就已經係真實。別人焦點以外嘅Jackie，其實可以係煙不離手嘅臭寸西女人。不過唔緊要，因為佢知道自己可以建構「真相」。

References:

Binlot, Ann. (2014) "Andy Warhol's Jackie", W Magazine,  http://www.wmagazine.com/story/andy-warhol-jackie-kennedy-onassis browsed on 26 February 2017.

John F. Kennedy Presidential Library and Museum, https://www.jfklibrary.org/JFK/Media-Gallery.aspx browsed on 26 February 2017.

Wikipedia, (2017) "Jacqueline Bouvier Kennedy" https://en.wikipedia.org/wiki/Jacqueline_Kennedy_Onassis browsed on 26 February 2017.

歐鎧淳

琴日 facebook 洗版嘅除左「3C」，就係香港游泳代表隊為「新世界維港泳」拍攝嘅宣傳照。反應係大致讚好嘅，但我對此有啲保留。其中最出事係歐鎧淳（唔洗驚，我唔係話佢走光），不過佢套白色泳衣最似底衫褲，加上頭髮濕濕，朱唇半張，目光呆滯......似乎帶有 provocative 嘅成份喎。

如果係model 或者藝人咁影我覺得ok，但係以港隊運動員身份我覺得個尺度要高啲。或者佢本人都唔覺有問題，我都只不過係讀過下 gender 先至略為指出到問題所在。咁呢個課題無絕對界線同準則嘅，但作為女仔要有呢種意識同警覺性，再自主選擇點樣將自己呈現於人前，咁先至可以保護到自己，唔係俾製作人搵左笨同埋俾人J左都唔知咩事。

#我係咪好似企喺學校門口捉人校裙嘅麻煩訓導
#又或者我係訓練囡囡嘅媽媽生呢

盂蘭節，我想推介一部港產片﹣《魂魄唔齊》

盂蘭節氣魄更壯  盂蘭勝會心中不必驚慌...

適逄盂蘭節，我想推介一部港產片《魂魄唔齊》。（2002年上映，當年我仲讀緊中學。）

話說，容祖兒飾演嘅紫雲飛係三十年代當紅嘅反串文武生，為左心儀嘅蔣二少(謝霆鋒飾)，破例一次演花旦，唱《樓台會》以表明心跡。可惜唱到一半，戲棚上其中一塊花牌鬆脫，紫雲飛被擊中頭部削去半邊面而死。其魂魄因而劈成兩半，其中半個魂魄投胎成為陳奕迅飾演嘅路初八，所以紫雲飛想初八為佢完成心願，唱埋未完嘅《樓台會》，以及尋找蔣二少嘅下落。

陳奕迅，容祖兒，謝霆鋒，鄭希兒，齋睇cast似係英皇群星偶像劇。不過令我最印象深刻嘅就係楊淇，佢飾演一個對靈界好奇一直好恨見鬼嘅女仔，到後來終於俾佢見到，就係佢父親吉叔(文千歲飾)，原來失踪多時嘅吉叔喺內地遇上交通意外身亡。「傻女，唔好喊啦，你咪一直都想見到鬼架咩？」楊淇淚流滿面呢一幕令我至今仍然歷歷在目，就係果時開始鍾意左楊淇。佢就係憑呢套戲獲得22屆香港電影金像獎最佳新演員提名。佢演戲真摯自然，笑容又好燦爛，靚得黎好舒服(除左真人靚，喺麥曦茵鏡頭下尤其靚)。近年見佢越黎越多演出機會都替佢高興。

除此之外，當年容祖兒為左演呢個角色，特登跟紅線女學過唱腔造手，後來二人出席一個公開場合，女姐叫祖兒即席唱兩句粵曲，但祖兒扭扭擰擰，搞到女姐有啲掃興，場面尷尷尬尬。不過最近小鳳姐喺演唱會即興叫坐喺觀眾席陪母親睇騷嘅容祖兒上台，佢手到拿來咁就可以同小鳳姐合唱一曲《順流逆流》，講野得體又唔失禮，可見佢不經意在這圈中轉到這年頭已經歷練得越黎越有大將之風。

雖然當年部戲成績唔算好理想，但衍生出嘅兩首主題曲《1874》同《特別嘉賓》喺卡拉OK熱唱。

P.S. 戲中將《鳳閣恩仇未了情》改成hip hop版嘅係紅極一時嘅地下組合「MP4」，代表作有《老豆咪索茄》。


Reference：
CIA坐談會﹣《魂魄唔齊》
http://www.filmcritics.org.hk/node/1285

《如果我在東京不快樂》

隨著盤菜瑩子的知名度越來越高，越來越多人將新界圍村傳統食物﹣盆菜，寫成「盤」菜。

簡單來說，盤與盆皆是器皿，盤比較淺，盆比較深。用來端著一碟碟餸的是托盤，傳統盆菜的盆原是村民日常起居所用的洗面盆或盛水的盆。由於多數用作盛水，所以形狀都比較深。

若果以為盤菜瑩子只是一個戲仿某大台新聞報導員名字的二次創作，未免太膚淺了。

正如腦細林日曦形容：「盤菜瑩子，就像盆菜一樣複雜。」

我地呢一輩嘅人，成長於首爾仍叫漢城的那個年代，韓流還未成氣候，在文化／潮流／飲食／電玩／動漫／明星／音樂......等等，在某方面某程度上唔多唔少總會對日本有啲嚮往。而盤菜瑩子正正做左我地好多隨意門即使淮我打開兩秒後我就回來嘅人唔會咁做﹠唔會敢做嘅事。（咁講係咪有啲似尋找他鄉的故事嘅開場白？）

偶然的 tourist gaze 是浪漫的，長時間朝夕相對或會因加深了解而發現與最初的印象有所不同。無論快樂不快樂，都是經歷，正如盆菜匯聚了多種材料的精華才變得豐盛美味。如果將這本書歸類與同期推出的寫真比較，似乎忽視了其內涵吧！

當日簽名會原定時間為12﹣1pm，直至1pm 輪候簽名的人龍還捲了三個髮夾灣，但盤菜瑩子仍然堅持為每本書畫畫蓋印簽名拍照，並沒有因時間關係省略任何一個步驟，而且更向每一位讀者親手遞上她代言的奧樂蜜C作贈品，這份誠意是可貴的。

《綠豆中的瑪嘉烈‬》：Who's bad?

悶左成晚，就係鋪呢一幕。（一路只係片段重播真係差點要𠝹櫈）

趙子龍成個救世者判官咁，企喺道德高地狠狠給瑪嘉烈一個教訓。
其身不正又有咩資格教訓人？
五十步笑百步嘅係瑪嘉烈定係趙子龍？
抑或正正因為趙子龍唔係善男信女，所以佢最懂得用咩方法對付瑪嘉烈呢種朝秦暮楚嘅人？

《瑪嘉烈與大衛系列﹣綠豆》‬：離開大衛之後，瑪嘉烈艷麗也黯啞

瑪嘉烈與大衛雖然唔夾，仲成日為芝麻綠豆嘅小事嘈交，但好多時大衛都係妥協嘅一方。瑪嘉烈長期喺大衛嘅遷就縱寵下，漸漸覺得一切理所當然，變得恃寵生嬌，就算有野要隱瞞大衛，佢都唔會刻意組織一啲言之成理嘅大話，往往只係隨口噏。一旦前言不對後語鬼拍後尾枕露出馬腳，抱住你信就信唔信就算嘅心態，好似搽左面懵膏咁厚顏無恥。

不過一物治一物，無論瑪嘉烈喺大衛面前乜都死唔認錯仲惡人先告狀，但喺趙子龍面前就無所遁形，再濃嘅妝都掩飾唔到佢嘅真面目，迅即崩潰，變得無地自容。

無法面對大衛，無法面對自己，加上失去Candy呢個好友(因為對方戀愛大過天)，令素來外向嘅瑪嘉烈變得頹喪，自我封閉。

女為悅己者容，沒有大衛的瑪嘉烈，艷麗也黯啞。