金都

因為對《歎息橋》意猶未盡，所以想睇由《歎息橋》編劇黃綺琳導演兼編劇嘅《金都》。

未知黃綺琳何方神聖果陣，只見鄧麗欣著裙褂嘅《金都》電影海報，不其然聯想起佢過去多次演出果啲十分獨家愛果類愛情電影。愛情電影往往離不開由零開始到終成眷屬或出現構成威脅嘅第三者，因為咁先至夠dramatic，總之以年輕靚仔靚女偶像陣容作招徠就有一定嘅票房。而且由「MK活地阿倫」執導，佢鏡頭下嘅女角總係好似好蠢咁。電影一直都係男性支配嘅世界，縱然幕前女角無數，但幕後製作人都係男性居多，真正由女性角度出發嘅電影都係少數。而《金都》導演兼編劇黃綺琳成功呈現到好多男人往往唔明女人點解嬲嘅生活細節。可能鄧麗欣同我年紀相近，(得罪講句)由Cookies出道到而家一直都唔覺得佢特別有星味，就好似我係某個同學／朋友，今次以近乎素顏嘅淡妝演張莉芳，好貼近現實。加埋男主角朱栢康，一睇就覺得好似某啲fd嘅男朋友／老公。就係果種讀書時期見住佢地拍拖嘅朋友，到踏入3字頭都差不多結晒婚有小朋友，好順理成章嘅人生路線圖。又由於呢個年紀嘅消費能力，搞結婚多數都係喺金都商場張羅一切。電影《金都》顧名思義場景集中喺金都商場，角色設定男女主角都喺金都商場從事結婚相關嘅工作，居住喺商場樓上嘅住宅。如果有細心留意唔難發現電影左有唔少巧妙嘅呼應。金都商場位於太子「Prince Edward」，以歷史上出名不愛江山愛美人嘅愛德華王子命名嘅地方名。英文戲名「My Prince Edward」，每個女仔都唔多唔少會有嫁白馬王子嘅憧憬。雖然男主角叫Edward，但無論外形性格各方面都明顯與理想中嘅白馬王子有好大落差。當一切習以為常，係咪順理成章要結婚？「假老公」嘅出現以outsider身份一語道破當局者嘅迷。

除左要思考係咪同Edward結婚，亦都反思婚姻嘅觀念。儘管時代轉變，離離合合看似好隨便嘅事，以為無所謂但其實好多傳統觀念仍然根深蒂固。揀婚紗要揀純白，代表隻豬仲喺度，結婚證書要P圖掩飾曾經離婚。。。其實大家都心知肚明，但就係寧俾人知莫俾人見。典型麻甩佬Edward嚴人己寬，處處管束阿芳，衫領唔可以太闊露出bra帶，褲唔可以太短，不時whatsapp查問行蹤，不問自取睇手機訊息同摷佢手袋。同阿芳未婚同居，有婚前性行為嘅習慣，但若然女方婚前性行為嘅對象唔係佢，或者認識佢之前已經同人發生性行為，就係罪大惡極。當得悉阿芳曾經同人假結婚，最介意係阿芳有無同人上床。阿芳同「假老公」返大陸辦離婚手續時，話Edward 會寧願佢坐中港巴撞車死都唔想佢同人有染。

最後阿芳毅然辭職，搬離男友屋企，離開果陣唔係搭飛機，唔係火車，而係中港巴，因為中港巴嘅巴士站正正就喺金都外面。雖然無實際交代阿芳之後會住邊，做咩工作，但唔再覆message，鍾意嘅野想買就買，感覺到佢自由了。慶幸黃綺琳結尾寫左個出口俾阿芳，令觀眾釋懷又有想像空間。