向來都唔鍾意薛凱琪，覺得佢講野好作狀，但漸漸俾佢果一種淒戚嘅歌女感覺所吸引，例如《慕容雪》同《除下吊帶前》。
《8月號》都係。
MV裏穿著華麗的晚裝，站在人咁高嘅巨型雜誌前，閃光燈下騷首弄姿，穿梭於每一頁之間，薛凱琪彷彿(objectified)物化成雜誌一併供人閱覽，有點迷失，有點厭倦，有點幽怨……後來卸下濃妝豔抹，展現所謂嘅「真我」，帶笑離去。
藝人不嬲都被包裝成商品供消費者娛樂，賣藝包埋獻身，半賣半送。《8月號》嘅歌者亦都好樂意分享喜怒哀樂，唔會帶你遊花園，唔講大話，唔堆砌，但係呢個係咪真嘅佢呢？畢竟藝人同觀眾嘅接觸都隔著一層media representation。
每個人都有別人睇唔到嘅一面，請容許一點祕密空間。
女：「記得我喺度同佢講我愛你。
第一次黎呢度，就喺五枝旗桿等。
第一次見到明星。
星期日喺度行街會撞到朋友。
星期三，一樣會撞到朋友。
記得放工黎呢度拍拖，拍拖黎呢度買野，買完野，啱啱倒數。就喺果刻，我心裏面講句：我愛你。」
男：「你係鍾意呢度嘅。」
女：「一個海港只有一個海港城。」
男：「記得我喺度同佢講我會等你。
第一次黎呢度，就喺五枝旗桿等。
記得細個，阿爸帶我黎買糖。
第一次出糧，買錶俾自己。結果買多兩隻。
記得星期日響度撞到朋友。
星期三，撞到女朋友。
記得我喺度同佢講：我會等你。其實我偷偷地去買新相機。」
女：「你係鍾意呢度嘅。」
男：「一個海港只有一個海港城。」
海港城嘅廣告一向以女性為主，例如心入民心嘅「心情好買鞋」「做女人點可以唔化」…反映Shopping唔係女性嘅專利，男性都鍾意買野嘅，所以廣告分別有男性為第一人稱及女性作第一人稱嘅版本。
廣告主要係用左回憶黎引起觀眾共嗚。你細個都黎過呢度，你都試過喺度等人，你都試過喺度撞到朋友，撞過明星，第一次出糧喺度買野，喺度拍拖，喺廣東道倒數……
童年回憶，反映出海港城都算係香港同級數商場之中歷史較悠久嘅商場 (不過透過裝修及不斷擴張，沒有老化嘅感覺)。加上五枝旗桿就係呢個商場嘅特色，(八九十年代好興約喺果度等人，亦有唔少電視電影有呢個橋段)。而家商場來來去去都係果d店鋪，尤其近年尖沙咀有不少新商場冒起，海港城更加要強調其獨特性，「一個海港，只有一個海港城。」面向維多利亞港，停泊著大型遊輪，優越嘅地理位置，唔會同其他商場混淆。「第一次出糧，買錶俾自己。」有意義有紀念嘅消費。「撞到朋友」，反映呢個商場嘅大眾化，你同我都會去果度留連，所以唔難撞到。「撞到明星」，明星係一個fantasy嘅identity，亦反映商場嘅高檔。因為高檔，所以明星都會黎。就算你未真係撞過，你都會憧憬撞到。廣告中係taken for granted嘅異性戀意識形態。「你係鍾意呢度嘅」男聲讀白由女聲回應；女聲讀白由男聲回應。「我愛你」無清楚交代「你」是誰，可以係人，係自己嘅另一半，亦都可以係地方，(呼應之後的一句「你係鍾意呢度嘅」)，任由觀眾自行解讀。廣告營造紫醉金迷嘅氣氛，衣著打扮華麗得有點不現實(有幾可見到行街嘅人係著成咁先)，拎住大抽氫氣球，翻飛嘅棉花糖，倒數嘅煙花……令你對呢個地方充滿fantasy。
就係呢啲情感、呢啲意義、呢啲 fantasy令你點解喺個個商場都係果啲鋪頭嘅時候依然揀去呢度而唔係其他。
有無聽過《北風和太陽》嘅寓言故事？北風同太陽兩個喺度鬥叻，咁不如比賽啦，啱啱有個人行過，邊個可以令果個人除衫嘅就贏。北風起勢咁吹想吹甩佢件衫，但係越凍果個人就越捉實件衫，點都吹唔開。到太陽喇，太陽發熱令氣溫暖番仲開始熱，果個人就自動除衫仲跳埋落水。故事講嘅就係受軟唔受硬，軟攻比強攻更能達到目的。
Romantic capitalism就係類似嘅道理。馬克斯(Karl Marx)講嘅capitalism資本家(capitalist)由生產過程剝削對工人階級 (working class) 用黎分析今時今日已經唔夠全面，剝削已經伸展到消費嘅層面。由強硬嘅壓榨變到溫柔嘅蠶食。浪漫愛情係現世嘅宗教，喺呢個亂世[1]提供精神寄託，所以商品往往都加入浪漫嘅元素作包裝，消費嘅同時擁有如沐春風嘅浪漫感覺。Shopping mall 就係其中一項new means of consumption[2]令你著迷(enchanted)，引誘你消費，令人消費多過佢地本身所需，甚至係多過佢地所負擔得起。以前五枝旗桿等，係會約實幾點喺一個固定嘅地方等。而家因為手機嘅普及，通常只係會約大概時間大概地點，rationalization時間就係金錢，覺得企實一個地方等人係浪費時間咁，你未到我就行下睇下野先。可見Enchantment中亦有rationalization，兩者在後現代社會你中有我我中有你咁存在著。五光十色，花多眼亂，意亂情迷，喺商場逗留得越耐，就越大機會消費，原本等人唔覺唔覺就變左買野。出糧買錶，賺左錢就要買啲野，叫做獎勵下自己？資本家透過廣告等各種手法鼓吹賺到錢就要消費嘅風氣，打工仔從資本家手中賺取人工，轉個頭透過消費將d錢落入另一資本家手中。諗住買一隻結果買多兩隻，入左迷暈陣會令你買多左野。因為洗左錢又要繼續工作賺錢喇，賺完去洗，洗完又要再賺……循環不息，勞力是無止境。活在塵世中嘅你，又唔察覺自己俾人抽緊水個喎，仲不知幾開心咁將金錢乖乖奉獻，就算買唔到你通常會覺得係自己嘅能力問題，而唔會覺得個機制有問題。呢個就係romantic capitalism嘅魔力。
羊毛出自羊身上，商場用喺廣告、包裝嘅錢就會轉嫁到舖租，商戶就將舖租轉嫁去調高商品價格，到頭來都係消費者負擔番。
明知俾人呃都繼續中個頭埋去？氹得你開心吖嘛。你係鍾意呃呃氹氹嘅~ (只要唔係輸身家的話)
[1]有一派社會學家如Anthony Giddens形容後現代社會係充滿風險嘅社會(risk society)，現代社會時期(modern society)大眾相信理性科學相信權威，但進入左後現代社會好多野已經無絕對嘅對與錯，訊息萬變，今日係咁聽日已經唔係咁，專家權威已經無以前咁可靠，政府俾人狂插，好多人覺得未來無法掌握，面對好多uncertainty，變得不安。
[2] New means of consumption係指一啲令消費者消費嘅方法/手段，如：信用卡、商場、主題公園等，總之令商家最得益嘅。
有人話亦舒嘅小說寫親都係俊男美女，佢話：「世上已經那麼多醜陋的事和粗鄙的人，娛樂時想看到年輕漂亮的面孔，人之常情嘛。」[1]
香水廣告尤其係，當電視廣告仲未先進到可以聞到香味嘅時候，附帶嘅感覺好緊要。香水從來都唔只係除臭咁簡單，看似虛無飄渺卻係魅力、誘惑、催情……甚至有講法話人對氣味嘅記憶勝於其他嘅感官。細細枝賣到貴一貴，意義大於一切。
風和日麗，春光明媚，公園調情，床上繾綣。加埋大有來頭嘅配樂 "Je t'aime... moi non plus"，法國品牌理所當然用番法國嘅歌，歌詞係關於一對戀人做愛時嘅情慾對答，當中夾雜著呻吟聲，仲有呢首歌背後原來有一個傳奇故事[2]。
係咪好浪漫呢？係咪想入非非呢？
雖然係erotic，但女主角有別於典型嘅sex object[3]。由Natalie Portman演Miss Dior，佢俾人嘅印象係性感、靚得黎又有點演技嘅女星，唔係花瓶，女人都鍾意佢/ 唔抗拒佢嘅 (有d女人係會無la la俾女人莫名其妙地憎)。 顯然廣告係由女性角度出發的，Miss Dior 解開情人嘅黑色蝴蝶領結，蒙住情人對眼，到繞在自己頸上把玩著，一副悠然自得嘅樣子。因為呢隻香水嘅target audience 同 target consumer都係女性。我用呢隻香水，我就係Natalie Portman。廣告中黑色蝴蝶結係一個重要符號，男主角嘅黑色蝴蝶領結，傳統Dior香水瓶 “The Legendary Bottle”[4] 同樣繫住黑色蝴蝶結，而新香水瓶嘅設計仍保留蝴蝶結嘅元素。擁有香水 = 擁有埋個男人，擁有浪漫，擁有廣告裏面嘅一切。
不過男性睇呢個廣告可能有另一番解讀，Natalie Portman！正喎，加埋配樂模擬嘅呻吟女聲，「稍為鹹濕少少都扯扯地」[5]。買呢枝香水俾條女呢，我條女就會變左Natalie Portman喇。又甚至買呢枝香水返黎索一索，我就擁有Natalie Portman……引發無限幻想……
無論點睇都好，相比Natalie Portman 拍波蘭斯基執導嘅虛疑香水廣告[6]，Dior呢個男性支配感無咁強。
現實太多不如意，需要一些麻醉劑。romantic capitalism[7]！
彼思動畫25年展覽，睇到好多分別用鉛筆、木顏色、marker、粉彩、水彩、墨水、塑膠彩、數碼繪圖嘅畫，好靚好靚，十分enchanted，大開眼界然後發覺自己畫畫仍然有好大嘅進步空間。
可是亦看到一些睇唔過眼的事。管理員不停叫著不准拍照，D人依然故我地大無私讓影影影，有的知道不能影相就感到十分沒趣，好悶。也許，他們都被商場展覽縱壞了。在香港，大眾看得最多嘅展覽都係喺商場，商場為左增加人流，每逢過時過節總會搞d展覽。展覽有無意義/訊息帶出？邊個係創作人？唔知。咩都唔緊要，總之公仔夠得意，有理無理有得企埋去影一大餐就開心，喺商場消費滿幾多錢就有乜野送......呢個就係現今消費社會主導嘅展覽。
而今次彼思展覽嘅地點係政府康文署轄下嘅文化博物館。雖然算不上係莊嚴嘅地方，但起碼都算係保持安靜不准飲食果類嘅展覽場所。一般展覽只要在不用閃光燈的情況下是准許拍照的。今次彼思展覽因為作品嘅版權問題，除了館外的擺設，館內一律不准拍照。這不是文化博物館第一個不准拍照的展覽，但是次展覽的由於題材關係，吸引了看迪士尼動畫的龐大觀眾群，(無錯，博物館及傳媒亦以此作招徠賣點。) 這群人大多是博物館的稀客，遺忘了或根本沒有參觀博物館要遵守應有的守規則的意識，所以釀成左咁嘅局面。
講真，在香港這個消費主導嘅社會，人流總是聚集在消費場所，博物館通常係讀書時跟學校去一次起兩次止的事，那麼博物館又會有多少個常客呢。當然博物館並不是以人流來衝量其存在價值，相反在消費主導的社會，更加應該舉辦一D商場唔會搞嘅展覽，好讓非主流非商業化的創作人/藝術家得以生存，照顧小眾興趣。不過站在商業化的洪流裏難免有所動搖或被動搖，不只是商場，博物館也希望吸引人流呀，想藉此吐一吐氣揚眉，好得對上頭、對彼思有交代。
或者，往好方面想就是吸引一些不會到博物館的人到博物館，可是吸引呢班人嘅同時係咪應該將參觀博物館嘅意識灌輸埋俾佢地呢？明白你都係因為鍾意先至想影低留念，但話明唔准影相仲要影，係咪好唔尊重創作人呢？創作人都係想多D人欣賞先至將作品展覽出黎與大眾分享，如果創作人見到個個都咁唔守規矩，決定收埋作品唔再供諸同好，最壞可能係連帶其他創作人都因為今次見到一班不成氣候嘅參觀者而拒絕展覽，睇都無得睇，到時係我地大眾嘅損失。
城市嘅發展除左著重capital之外，cultural capital都好緊要，否則西甚麼九文化藝術區只會淪為一個地產項目。除了硬件的建設，還須軟件的配合。
