彼思展覽的反思

彼思動畫25年展覽，睇到好多分別用鉛筆、木顏色、marker、粉彩、水彩、墨水、塑膠彩、數碼繪圖嘅畫，好靚好靚，十分enchanted，大開眼界然後發覺自己畫畫仍然有好大嘅進步空間。

可是亦看到一些睇唔過眼的事。管理員不停叫著不准拍照，D人依然故我地大無私讓影影影，有的知道不能影相就感到十分沒趣，好悶。也許，他們都被商場展覽縱壞了。在香港，大眾看得最多嘅展覽都係喺商場，商場為左增加人流，每逢過時過節總會搞d展覽。展覽有無意義/訊息帶出？邊個係創作人？唔知。咩都唔緊要，總之公仔夠得意，有理無理有得企埋去影一大餐就開心，喺商場消費滿幾多錢就有乜野送......呢個就係現今消費社會主導嘅展覽。

而今次彼思展覽嘅地點係政府康文署轄下嘅文化博物館。雖然算不上係莊嚴嘅地方，但起碼都算係保持安靜不准飲食果類嘅展覽場所。一般展覽只要在不用閃光燈的情況下是准許拍照的。今次彼思展覽因為作品嘅版權問題，除了館外的擺設，館內一律不准拍照。這不是文化博物館第一個不准拍照的展覽，但是次展覽的由於題材關係，吸引了看迪士尼動畫的龐大觀眾群，(無錯，博物館及傳媒亦以此作招徠賣點。) 這群人大多是博物館的稀客，遺忘了或根本沒有參觀博物館要遵守應有的守規則的意識，所以釀成左咁嘅局面。

講真，在香港這個消費主導嘅社會，人流總是聚集在消費場所，博物館通常係讀書時跟學校去一次起兩次止的事，那麼博物館又會有多少個常客呢。當然博物館並不是以人流來衝量其存在價值，相反在消費主導的社會，更加應該舉辦一D商場唔會搞嘅展覽，好讓非主流非商業化的創作人/藝術家得以生存，照顧小眾興趣。不過站在商業化的洪流裏難免有所動搖或被動搖，不只是商場，博物館也希望吸引人流呀，想藉此吐一吐氣揚眉，好得對上頭、對彼思有交代。

或者，往好方面想就是吸引一些不會到博物館的人到博物館，可是吸引呢班人嘅同時係咪應該將參觀博物館嘅意識灌輸埋俾佢地呢？明白你都係因為鍾意先至想影低留念，但話明唔准影相仲要影，係咪好唔尊重創作人呢？創作人都係想多D人欣賞先至將作品展覽出黎與大眾分享，如果創作人見到個個都咁唔守規矩，決定收埋作品唔再供諸同好，最壞可能係連帶其他創作人都因為今次見到一班不成氣候嘅參觀者而拒絕展覽，睇都無得睇，到時係我地大眾嘅損失。

城市嘅發展除左著重capital之外，cultural capital都好緊要，否則西甚麼九文化藝術區只會淪為一個地產項目。除了硬件的建設，還須軟件的配合。

囡囡

一開頭24味嘅 “照做”，好正好有meaning~

最初源於日本嘅援交，係唔一定有性服務嘅，男人俾錢少女陪食飯行街，買嘅係拍拖浪漫嘅感覺，不過呢套戲入面講嘅援交都係指有性服務嘅。

援交嘅興起，睇到性工作呢行演變到消費嘅唔只係性服務，消費嘅仲包括感情。提供服務嘅囡囡會扮演女友嘅角色，拖手食飯行街傾計然後先至爆房。就好似而家d從事服務業既人成日都要懶係friendly咁同你講佢叫咩名，又問你叫咩名，好似朋友咁建立感情，呢d係營造出黎既假象，俾人唔係好做生意既感覺，員工係emotional labour, 即係從事呢d職業嘅人在工作上要展現一d情感，而呢d情感未必係發自內心嘅，甚至係違背良心嘅 (異化Alienation)，好似果d"好高興為你服務"一聽就知其實講果個人一d都唔高興，一切都係睇錢份上。

援交與物質主義掛勾
今時今日消費已經唔係買件貨，實用就得，買嘅仲包括件貨附帶嘅象徵。靠消費呢d物品黎建構自己嘅身份。仲有「潮流」呢樣野，d野唔會用爛先買過個，一有新款出就要買要跟要追，唔係會好out~
呢d都係商家營造出黎去賺多d錢嘅手法，畢竟錢唔會嫌多。搞到個社會好物質，大眾好物質，為左買名牌，追求物質上嘅滿足，人仔細細嘅少女去邊度搵咁多錢？仲要係快錢？做援交law~

但有物質滿足還是會寂寞
家境富裕嘅冼色麗擺低錢俾客，係反主導嘅表現，似要表示佢同一般囡囡唔同，唔係為錢，令自己感覺好d。由此反映佢做援交只因寂寞。
追求物質、缺乏emotional support令人心靈空虛。

諗起梁朝偉喺《春光乍洩》有一句：原來寂寞嘅時候，所有嘅人都一樣。

臨尾估你唔到，AV達人原來係個13歲男仔，幽左身份混亂嘅網上世界一默。
援交就係危險在咩野客都有，而援交本身亦係一d唔見得光嘅野，遇到咩野事都唔可以/唔願用正途(如報警)去處理，一來從事援交嘅人唔想人知佢做呢d野，二來就算想求助，其他人(包括警察)亦會用有色眼鏡去睇佢地。講到呢度，我同明哥都贊成性工作合法化，有制度規管得好d，不過實會引起合法=鼓吹嘅爭議，再有一連串道德問題。明哥話香港人好怪，一方面好似好open，其實好保守。


我鍾意《前度》入面嘅詩雅多過《囡囡》入面嘅詩雅。
《前度》嘅詩雅係大方得體嘅女友，俾男友嘅前度住喺屋企，相處得客客氣氣，毫無醋意(唔知真係無定係無顯露出黎la)，喺適當時候冷靜咁請佢走，到後來知道男友對前度動心，表示可以當無事發生，卻遭拒絕而傷心痛哭。佢令人睇得好舒服。
《囡囡》入面都係為男友設想嘅女友，但係得19歲嘅女仔，多了點衝動，多了點吱喳，好似細個番咁，睇完《前度》先睇《囡囡》感覺怪有趣。

同樣，睇完《前度》再睇《得閒炒飯》嘅威廉陳亦有細個番嘅感覺。

今晚得唔得閒睇得閒炒飯呀？

午飯過後，洗手間內，電話響起…

明哥：「今晚去唔去睇《得閒炒飯》呀？之前聽過你話想睇。」

我：「咁快有得睇喇咩？」

明哥：「阿邊個d fd突然有事去唔到多左兩張飛，好似話係首映黎tim喎…」

去！

人生第一次睇首映，仲要係咁正嘅電影，仲要見到周慧敏，真係好靚，加埋佢今日著左條好飄逸嘅裙直頭覺得佢係不食人間煙火嘅神仙！仲有呢套戲拍得我屋企(中環)好靚！行返屋企時先發覺，咦我咪經過緊戲裏面出現嘅地方，haha~

戲名《得閒炒飯》，感覺好隨意，炒飯喺台灣有做愛嘅意思， “得閒炒飯” 形容到做愛就好似普通社交活動咁普通。周慧敏同吳君如就係分別同陳偉霆張兆輝得閒炒飯而搞出人命。正因為呢兩條人命，令周慧敏吳君如佢地兩個重遇而舊情復熾……

最鍾意嘅橋段係二人在行人電梯上來來回回……吳君如為周慧敏穿上高踭鞋，然後二人跳起探戈來。由《春光乍洩》開始已經覺得跳探戈好型，也許探戈最能表現兩人關係中嘅拉扯。

睇完戲我地有事後討論，實質為得閒吹水，大家又有d gender底，不亦樂乎。

呢套戲嘅gimmick係同性戀，其實唔止，涉及嘅仲有雙性戀，姊弟戀，不婚媽媽……呢d被主流社會視為deviance嘅事宜，父權主義係首當其衝嘅意識形態。

套戲一開始吳君如同一個外籍男同性戀者註冊結婚等佢可以有居港權同佢嘅同性戀人一齊represent對婚姻制度衝擊。同性戀喺香港無異性戀嘅權利，(香港)無得結婚，連帶一切嘅以配偶身份先可以獲得嘅權利都無埋，例如萬綺雯谷祖琳呢對homosexual couples想領養兒童但遇到諸多阻撓，除非以單身女性嘅身份領養disable child~

同性戀會俾異性戀歧視，同性戀亦會discriminate 雙性戀，覺得佢地騎牆同埋濫。

張兆輝嘅角色係一個打老婆嘅大男人。因為細個見到阿爸都係咁打阿媽，潛移默化左咁樣係 “合理”嘅相處方式。
飾演嫩口大學生嘅陳偉霆，鍾意年紀比自己大嘅周慧敏，申訴點解社會可以接受年紀大嘅男人同年紀細好多嘅女仔一齊但係反之男仔同年紀大自己好多嘅 “姐姐”就接受唔到，represent breaking the norms。
These two roles view lesbian in a heterosexual male gaze. 不過後來對佢地了解多左之後改觀。

唔知係我孤陋寡聞定咩la，印象中通常d婦權分子都係女同性戀者。明哥話因為女人唔會幫女人。咁又係喎，女人對女人刻薄起上黎可以好刻薄。女人用父權果把尺黎衡量女人可以比男人睇女人更嚴苛。例如戲中周慧敏嘅女同事。

通常同性戀角色都係外型討好，well-educated中產住中環有品味。浪漫化左同性戀，也許這樣的同性戀才能切合異性主流社會嘅消費市場。

media對homosexual couples嘅representation，總係一個比較masculine，一個比較feminine。呢套戲明顯吳君如係masculine，周慧敏係feminine。相對地萬綺雯同谷祖琳呢一對就無咁明顯嘅區分。
我覺得一段關係，無論男女/男男/女女，總會一個masculine一個feminine，而且亦會角色亙換，有時你masculine我feminine；有時我masculine你feminine。
it’s all about love.